ДАЪВОҲО ДАР МАСЪАЛАИ ШИРКАТИ АЛЮМИНИИ ТОҶИК БЕАСОСАНД

Душанбе,  5 апрел. (АМИТ «Ховар», Кристина  Эрлих). —  Роҳбари  дафтари  матбуоти  Корхонаи  воҳиди давлатии «Ширкати алюминии  Тоҷикистон»  Саёҳат  Қодирова  ба  мухбири  АМИТ «Ховар»  хабар  дод, ки тобистони соли равон  дар  корхона ташхиси  байналмилалии  экологӣ  гузаронида  мешавад.  Қайд  карда  шуд, ки  чунин  ташхис  ҳар  сол  бо  иштироки  мутахассисони   созмонҳои байналмилалии  экологӣ  баргузор  мегардад. Дар  ҷараёни ташхис  таъсири  фаъолияти  корхона  ба   табиат  ва  мухити  атроф  ҳамаҷониба  санҷида  мешавад.  Айни  ҳол   таҷҳизот  ва  асбобу  анҷоми   коргоҳҳои  корхона  тармим  ва   таҷдид  карда  мешаванд.   Инчунин  тайёрӣ  ба   ташхиси  техникии он   давом  дорад.  Соли равон  барои   амалӣ  сохтани тадбирҳои  экологӣ  дар  корхона  бештар  аз  30  миллион  сомонӣ   ҷудо  карда шуд. Соли гузашта  барои  иҷрои  чунин  тадбирҳо  29,4   миллион  сомонӣ  сарф шуд.  Ташхиси байналмилалӣ  мувофиқати  фаъолияти  корхонаро ба  меъёрҳои   байналхалқии  экологӣ  муайян  менамояд,  гуфт  Саёҳат  Қодирова. Мухбири  АМИТ «Ховар»  ёдовар  мешавад, ки  ҳафтаи  гузашта   фаъолони  созмонҳои  экологии  Ӯзбекистон  дар  вилояти Сурхондарё  намоишҳои  эътирозӣ  ташкил  намуданд. Онҳо  даъво  доранд, ки  партовҳои   ширкати   алюминии  Тоҷикистон  ба   муҳити  зист  таъсири  манфӣ  мерасонад. С.Қодирова  таъкид  намуд, ки  даъвои  мазкур  ягон  асоси  воқеӣ  надорад. Тавре  зикр  шуд,  айни  ҳол  дар  корхона  тармиму таҷдид  ва иваз  кардани  таҷҳизоту  воситаҳои  технологӣ  давом  дорад. Бо  ин  мақсад  дар  давоми   чор  соли охир  196  миллион   доллари  ИМА  сарф  карда шуд,  гуфт  дар  хотима   роҳбари  дафтари  матбуоти  Ширкати  алюминии  Тоҷикистон.