ДОНИШҶӮ БА ҚОЧОҚИ САНГҲОИ ҚИМАТБАҲО МАШҒУЛ БУД

Душанбе, 6 апрел. (АМИТ «Ховар», Жасмин Назарова). – Аз ҷониби кормандони бахши кофтукови ҷиноии шўъбаи корҳои дохилии ноҳияи Дарвози ВМКБ, рўзи 5 апрели соли равон дар дидбонгоҳи Зиғар автомашинаи тамғаи «Митсубиси — Демегра» рақами давлатиаш ЕО 13 17 РТ 01 таҳти идораи шаҳрванд Озод Қарачабекови 32 сола, истиқоматкунандаи шаҳри Душанбе боздошт шуд. Тавре аз дафтари матбуоти Вазорати корҳои дохилии ҶТ иттилоъ доданд, ҳангоми кофтуков аз дохили боғоҷи автомашина дар сумкаи варзишӣ 49 дона сангҳои сурхчатоби қиматбаҳои ёқут, ки вазни онҳо беш аз 31 граммро ташкил медод, дарёфт ва мусодира карда шуд. Сангҳои номбурда ба мусофири автомашинаи мазкур Саъди Ғуломшоеви 20 сола, истиқоматкунандаи ноҳияи Мурғоб, донишҷўи Донишгоҳи миллии Тоҷикистон тааллуқ доштанд. Нисбати ин далел парвандаи ҷиноӣ оғоз шуда, тафтишот идома дорад.