ГУФТУГӮИ ТЕЛЕФОНИИ ПРЕЗИДЕНТ БО РАИСОНИ ХАТЛОН

13 апрели соли 2010 ба Президенти Ҷумҳурии Тоҷикистон Эмомалӣ Раҳмон  Раиси вилояти Хатлон Ғайбулло Авзал ва раисони шаҳри Кўлобу ноҳияи Восеъ Ҳамид Абдуллоев ва Султон Валиев оид ба рафти бартарафсозии  оқибатҳои офатҳои табиии рўзҳои охир телефонӣ ҳисобот доданд. Аз ҷумла зикр гардид, ки корҳои зарурӣ баҳри бартараф намудани оқибатҳои боришоти шадиди борон ва обхезӣ дар ноҳияҳои Восеъ, Муъминобод, Шурообод, Балҷувон ва  Ховалинги вилояти Хатлон муташаккилона ба роҳ монда шудаанд. Сарвари давлат Эмомалӣ Раҳмон онҳоро вазифадор намуд, ки баҳри  ғамхорӣ зоҳир намудан ба аҳолии зарардида, хусусан  дар  ноҳияи Восеъ ва тезонидани  корҳо баҳри ҳар чи зудтар бартараф намудани  оқибатҳои офати табиӣ тадбирҳои  судбахш андешанд. Онҳо ҳамчунин вазифадор шуданд, ки ба комиссияи ҳукуматӣ ва намояндагони вазорату идораҳои дахлдор баҳри  босамар анҷом додани вазифаҳо оид ба кўмакрасонӣ ба мардуми зарардида ҳамаҷониба мусоидат намоянд. Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.