МУЛОҚОТИ Ш. ХАЙРУЛЛОЕВ БО АНАТОЛИЙ СЕРДЮКОВ

Душанбе,  15 апрел. (АМИТ «Ховар», Фирдавс  Таваров). —  Тавре  хабар  дода шуда буд,  дирӯз  дар  Маскав  маҷлиси  навбатии  Шӯрои  вазирони  мудофиаи  давлатҳои ИДМ   кушода шуд.  Дар  он  вазири  мудофиаи  Ҷумҳурии  Тоҷикистон  Шералӣ  Хайруллоев  низ  иштирок  дорад. Шералӣ  Хайруллоев  қабл  аз  оғози  маҷлис  бо  вазири  мудофиаи  Федератсияи  Русия  Анатолий  Сердюков  мулоқот  кард.  Зимни  мулоқот  вазъи  имрӯза  ва  нақшаҳои  ояндаи  ҳамкории  вазоратҳои  мудофиаи  ҳар  ду  кишвар   дар  соҳаҳои  гуногун  муҳокима  шуданд. Мухбири  АМИТ «Ховар»  хабар  медиҳад, ки  дар  маҷлис  инчунин  раиси  Кумитаи  иҷроияи  ИДМ —  котиби  иҷроияи  ИДМ Сергей  Лебедев,  котиби  Шӯрои  вазирони  мудофиа  Александр  Синайский, роҳбари  маркази  зиддитеррористии ИДМ,  генерал – полковники  милиса  Андрей  Новиков  ва  шахсони  дигари расмӣ  иштирок  доранд. Вазири  мудофиаи  Русия  А.Сердюков  маҷлисро  кушода,  изҳор  намуд, ки   асоси   вазъияти босуботи  ИДМ   ҳамкории  ҳарбию  низомии  давлатҳои  Иттиҳод ва таҷрибаи   пурғановати   онҳо   дар  соҳаи  ҳарбӣ  мебошад.  Шӯрои  вазирони  мудофиа  воситаи  самарабахши таъмини   амният  аст,  зеро   имрӯз  ҳам  хавфи  ба  вуҷуд  омадани  муноқишаҳои  нави  ҳарбӣ   аз  байн  нарафтааст. Дар  маҷлис   масъалаҳои  марбут ба  тайёрию  гузаронидани   иди  65 – солагии  ғалаба  дар Ҷанги  Бузурги  Ватанӣ  муҳокима  карда шуданд.  Шӯрои  вазирони  мудофиа матни муроҷиатномаро  ба   иштирокчиёну  ветеранҳои  Ҷанги  Бузурги  Ватанӣ,  қувваҳои  мусаллаҳ  ва   хизматчиёни  ҳарбии  давлатҳои  ИДМ  қабул  намуд. Иштирокчиёни  маҷлис  бештар  аз  20  масъаларо  муҳокима  намуданд. Ин  масъаларо  ба  силсилаи тадбирҳои  муштараки  беҳтар  намудани  фаъолияти   ҷузъу  томҳои  муҳандисии Қувваҳои  мусаллаҳи  давлатҳои  ИДМ,  низомномаи  фаъолияти  Кумитаи  ҳамоҳангсози  фармондеҳони  ҷузъу  томҳои  мудофиа  аз  аслиҳаи  радиатсионӣ ва  биологӣ,  такмили таъминоти  ҳуқуқии  ҳамкории доманадори  ҳарбӣ,  гузаронидани  озмуни  байналмилалии  асарҳои  илмии  ҳарбӣ,  ташкили   системаҳои  муттаҳидаи  таъминоти  ҳарбӣ,  ҷараёни  иҷрои  вазифаҳои таъминоти  метрологии қувваҳои  мусаллаҳ   ва  ғайра  марбут  мебошанд.