НИММАРАФОНИ БАЙНАЛМИЛАЛӢ ШУРӮЪ ШУД

Душанбе, 17 апрел.(АМИТ «Ховар», Марзия Саидова).- 17 апрел бахшида ба Рӯзи пойтахт дар шаҳри Душанбе ниммарафони байналмилалӣ оғоз шуд, ки дар он намояндагони барордаршаҳрҳои Душанбе аз кишварҳои Русия, Қазоқистон, Қирғизистон, Эрон, Чин Фаронса ва Канада иштирок доранд. Ин чорабинӣ дар масофаи 21 км 097 м – гузаронида шуда, нуқтаи оғози он КВД Ипподром- хиёбони Ҳофизи Шерозӣ ва нуқтаи анҷомаш майдони «Дӯстӣ» мебошад.                  Котиби матбуотии Раиси шаҳри Душанбе  Шавкат Саидов ба АМИТ «Ховар» иттилоъ дод, ки ниммарафон бо мақсади сазовор таҷлил намудани Рӯзи пойтахт, таъмини оммавияти тарбияи ҷисмонӣ ва варзиш, ташвиқу тарғиби ҳаракати байналмилалии олимпӣ ва тарзи ҳаёти солим, устувор намудани робитаҳои ҳамкорӣ бо бародаршаҳрҳои Душанбе гузаронида мешавад. Дар ниммарафон, ҳамзамон  варзишгарон аз ВМКБ, вилоятҳои Хатлон, Суғд, ноҳияҳои тобеи марказ ва гурӯҳи ноҳияҳои минтақаи Рашт инчунин, алоқамандону варзишгарони касбӣ, ки собиқаи ширкат дар чунин мусобиқаҳоро доранд, кормандони сафоратхонаҳо, созмонҳои байналмилалии дар Душанбе фаъолиятдошта иштирок доранд. Шаҳрдории Душанбе ба иштирокчиёни ниммарафон, ки ҷойҳои 1-ум то 6-умро ишғол мекунанд, бо мукофотҳои пулӣ аз ҷумла, барои ҷойи якум 15 330 сомонӣ ( 3500 $ ИМА), ҷойи дуюм 13140 сомонӣ (3000  $ ИМА), зинаи сеюм 10 950 сомонӣ (2500 $ ИМА), ҷойи 4-ум 8 760 сомонӣ (2000 $ ИМА), зинаи 5-ум 7884 сомонӣ (1800 $ ИМА), ҷойи 6-ум 6570 сомонӣ (1500 $ ИМА) қадрдонӣ менамояд.