«РОЛТОН»-ҲОИ ҒАЙРИСТАНДАРТӢ ДАР ХАТЛОН

  Душанбе, 9 апрел. (АМИТ «Ховар», Бекназари Абӯбакр). — Дар шаҳри Қӯрғонтеппа аз шаҳрванд Ҷамолиддин Ҷабборов 50 ҳазору 191 қуттӣ маҳсулоти макаронии зудвайроншавандаи тамғаи «Роллтон» мусодира гардид. Дар Агентии давлатии «Тоҷикстандарт» ба АМИТ «Ховар» иттилоъ доданд, ки як рӯз қабл аз мусодираи ин миқдор маҳсулот  Ҷамолиддин Ҷабборов ба сокини кӯчаи ба номи Садриддин Айнии шаҳри Қӯрғонтеппа  Ҳасан Арабов 300 қуттӣ «Ролтон»-ро ба маблағи 1300 $ фурӯхтааст. Санҷишҳо мушаххас намуданд, ки маҳсулоти мусодирашуда ҷавобгӯи талаботҳои стандартӣ набуда, тибқи қонунҳои амалкунандаи ҷумҳурӣ Ҷамолиддин Ҷабборов барои ба инобат нагирифтани ҳуқуқи истеъмолкунандагон ва бо роҳи фиреб фурӯхтани маҳсулоти вайроншуда, ба ҷаврбгарӣ кашида мешавад.