«ҶОМИ ШАҲРДОРӢ» НАСИБИ КӢ ХОҲАД ШУД?

Душанбе, 18 май.(АМИТ «Ховар», Марзия Саидова).-Дар доираи баргузории «Ҳафтаи ҷавонон», ки аз 17 то 23 май дар пойтахт идома меёбад барои дарёфти “Ҷоми шаҳрдорӣ» спартакиадаи варзишӣ аз рӯи намудҳои футбол, шоҳмот, волейбол ва баскетбол байни кормандони Мақомоти иҷроияи маҳаллии ҳокимияти давлатӣ дар шаҳри Душанбе ва ноҳияҳои он, ташкилоту муассисаҳои мустақили шаҳрдорӣ, инчунин муассисаҳои дар пойтахт фаъолиятдошта гузаронида мешавад. Аз раёсати ҷавонон, варзиш ва сайёҳии шаҳри Душанбе ба АМИТ «Ховар» иттилоъ доданд,  ки  ҳамзамон дар давоми «Ҳафтаи ҷавонон»   Фестивал озмуни сурудҳои ватандӯстонаи «Суруди сарбоз» байни қисмҳои низомии дар ҳудуди пойтахтбуда, гузаронида шуда, бо мақсади  баланд бардоштани ҷаҳонбинии ҷавонон дар ҷомеа дар  мактабҳои олии пойтахт, қисмҳои низомии дар қаламрави пойтахтбуда бо иштироки ҷавонон сӯҳбату мулоқот ташкил карда мешавад. Ҳамзамон, дар литсейҳо, коллеҷу омӯзишгоҳҳои касбию ҳунарӣ, ташкил ва гузаронидани озмунҳои иншо  ва мусаввараи беҳтарин дар мавзӯҳои «Шаҳри ман-Хонаи ман» ва «Манзараҳои шаҳри ман» дар назар аст.