«ЭКСПО – 2010» ДАВОМ ДОРАД

Душанбе,  13 май. (АМИТ «Ховар», Покиза  Маҳмадбекова). —  Намуди  берунии толори  Тоҷикистон  дар намоишгоҳи  байналмилалии «ЭКСПО – 2010»   дар  шаҳри  Шанхай  ба  қасрҳои  қадимаи  Ҳулбук ё  Хуҷанд  шабоҳат  дорад.  Кумитаи тадорукот  бо  назардошти  мавзӯи  асосии  намоишгоҳ  «Шаҳри  беҳтарин —  зиндагии  шоиста»  мавзӯи  толори  Тоҷикистонро  ба  таърихи  шаҳрсозии  тоҷикон  бахшид.  Дохили  толор  хонаи   муқаррарии  сокинони  Тоҷикистонро  ба  хотир  меорад.  Тамошобинонро  дар  ин  ҷо  бо  оҳанги  мусиқии  форами  тоҷикӣ   пешвоз  гирифта,  ба  онҳо  чойи  кабуди  тоҷикиро  пешкаш  менамоянд. Мухбири  АМИТ «Ховар»  хабар  медиҳад, ки  дар  давоми  даҳ  рӯзи  аввали  фаъолияти  намоишгоҳ  толори  Тоҷикистонро  шумораи   аз  ҳама  зиёди  тамошобинон тамошо  кардаанд.  Ин  натиҷаи  ороиши  хуби  дохили  толор  ва ташкили  ташвиқу  тарғиби  фарҳангу  санъати  тоҷикон  мебошад.  Ҳаминаш  ҷолиби  диққат  аст, ки  экспонатҳои  толори  Тоҷикистон  табиӣ  буда,  бевосита  аз  Тоҷикистон  оварда шудаанд. Тамошобинон  дар  бораи  таърихи  халқи  тоҷик,  дастовардҳои  имрӯзаи он  ва  хусусиятҳои  шаҳрсозии  миллии  тоҷикон  маълумоти  ҷолиби  диққат  дода  мешавад.  Ба тамошобинон  филмҳои «Таърихи  шаҳрсозии  тоҷикон»  ва  «Дастовардҳои имрӯзаи   фарҳангӣ,  туристӣ, илмию  техникӣ,  иқтисодӣ  ва  иҷтимоии  Тоҷикистон» — ро тамошо  мекунанд.