КӮЧОНИДАНИ МАРДУМИ ОФАТЗАДА БА МАНЗИЛИ ЗИСТ

Кӯлоб, 26 май. (АМИТ «Ховар», Сулаймон  Холов). — Бар  асоси  иттилои котиби матбуотии раиси шаҳри Кӯлоб Сӯҳробшо Фаррухшоев кӯчонидани  мардуми  офатзада  аз  хаймаҳои   муваққатӣ     ба  ҷои  зисти доимӣ оғоз  гардид. Ба  гуфтаи  ин манбаъ  то  ин  ҷониб  беш аз 100 нафар офатзадагон аз хаймаҳо ба ҷои зисти доимӣ    кӯчонида шуда, дигари онҳо баъди ду рӯз ба маҳаллаҳои нав     кӯчонида мешаванд. Мавриди зикр аст, ки сохтмони хонаҳои  истиқоматии зарардидагон аз офати табиӣ дар шаш маҳалла аз  тарафи  вазоратҳо   ва  шаҳру  ноҳияҳо  оғоз  гардида, кор дар ин самт  муташаккилона ҷараён дорад. Муродалӣ Алимардонов сардори ситоди бартарафсозии  оқибатҳои  офати  табиӣ дар минтақаи Кӯлоб ҳамаҷониба аз  шароити зисти зарардидагон воқиф буда, вазъи тандурустӣ, таъмини хӯрок ва таъмини ҷиҳозҳои хоби онҳоро зери  назорати қатъии худ гирифтааст, — афзуд  С. Фаррухшоев.