КОРҲОИ БАРТАРАФСОЗИИ ОФАТИ ТАБИӢ ДАР НОҲИЯИ ВОСЕЪ

Восеъ, 31 май. (АМИТ «Ховар», Сулаймон  Холов). — Дар ноҳияи Восеъ корҳои бартарафсозии офати табиӣ идома дорад. Дар ҳудуди ҷамоати Пахтакор, ки бар асари офати табиӣ таърихи 4 апрел бо омадани сел ва раҳна гардидани соҳили дарёи Ёхсу 29 хонаи истиқоматии сокинон ва роҳу пулҳои деҳаи Кӯчабоғи ноҳия пурра зарар дида буд, бо дастгирии Ҳукумати Ҷумҳурии Тоҷикистон иншооти харобгашта барқарор ва барои оилаҳои аз офати табиӣ зарардида хонаҳои нави истиқомати сохта ба истифода дода мешавад. Дар ин мавзеъ аз ҷониби мақомоти иҷроияи ҳокимияти давлатии ноҳияи Данғара то моҳи ноябри соли равон 5 хонаи истиқоматӣ мувофиқ ба талаботи меъморӣ бо сифати баланд ва шароити зарурии рӯзгор сохта мавриди истифода қарор дода мешавад.          Барои ҳарчи зудтар сохта ба истифода додани манзилҳои нав корҳои сохтмонӣ бо вусъат ҷараён дошта, мутахассисон узви оилаҳои зарардидаро ба кор ҷалб намуда, дар ҳамдастӣ хонаҳои истиқоматиро бунёд месозанд.