РОҲИ ХОРУҒ – ИШКОШИМ КУШОДА ШУД

Хоруғ,  18 май. (АМИТ «Ховар»,  Л.Додо). —  Мухбири  АМИТ «Ховар»  аз  Хоруғ   хабар  медиҳад, ки  шаби  17  май  дар  саросари  Бадахшон  борон  борид.  Аз  ситоди  ҳолатҳои  фавқулоддаи  вилоят  хабар  медиҳанд, ки  дар  мавзеи Харгӯшӣ  дар  километри 228 – уми   роҳи  мошингарди  Хоруғ – Мурғоб  сел  омада,  қитъаи  калони роҳро  шуста  бурд. Дар  наздикии  деҳаи  Огатгаҳани   ноҳияи  Роштқалъа  аз  кӯҳ  хоку  санги  зиёд  фурӯ  рехта,  роҳи  мошингардро  баст.  Дар  ин  ҷо ҳаракати  нақлиёт  ду  рӯз  боз  қатъ  гардидааст. Бар асари  борони  шадид дар  наздикии деҳаи  Лангари  ноҳияи  Тавилдара  сел  омада,  роҳи  мошингардро  хароб  намуд. Хабар  дода  мешавад, ки  дар  натиҷаи тадбирҳои  андешидаи   мутахассисони  идораи  ҳифзу  муроқибати роҳҳои  вилоят   роҳи  мошингарди Хоруғ – Ишкошим  соати  17 – и  17  май  кушода  шуд. Барои  кушодани   роҳҳои  дигари  вилоят  низ   тадбирҳо  андешида  мешаванд.