СӮЙИСТИФОДА АЗ ВАКОЛАТҲОИ МАНСАБӢ

Душанбе, 24 май. (АМИТ «Ховар», Жасмин Назарова). — Ҳангоми гузарондани чораҳои фаврӣ-ҷустуҷӯӣ аз ҷониби кормандони шӯъбаи мубориза бар зидди ҷиноятҳои мутташакилонаи раёсати корҳои дохилии вилояти Суғд, шаҳрванд Нуриддин Усмонови 55 – сола, истиқоматкунандаи шаҳри Хуҷанд, мутахассиси шӯъбаи меъмории Ҳукумати ш. Хуҷанд дастгир карда шуд. Тавре аз дафтари матбуоти Вазорати корҳои дохилии ҶТ иттилоъ доданд, Н. Усмонов аз ваколатҳои мансабии худ истифода намуда, ба шаҳрванд Абдуҳаким Тоирови 43 — сола, истиқоматкунандаи ҳамин шаҳр, бекор, бе иҷозатномаи махсуси роҳбарият лоиҳаи сохтмони иншоотро бо имзо ва мӯҳри сардорони корхонаҳои ҶДММ «Меъмор» Олимҷон Раҳматови 51 – сола ва ҶДММ «Асри-21» Ҷумъабой Раҳматови 43 – сола тартиб дода, аз А. Тоиров маблағи 10 ҳазору 600 сомониро гирифта, ба эҳтиёҷоти худ сарф намудааст. Нисбати ин далел парвандаи ҷиноӣ оғоз шуда, тафтишот идома дорад.