ШАҲРДОРИ ДУШАНБЕ БА ЗАРАРДИДАГОН КӮМАК РАСОНД

Душанбе, 17 май.(АМИТ «Ховар», Марзия Саидова).-Дар асоси Қарори Раиси шаҳри Душанбе Маҳмадсаид Убайдуллоев аз ҷониби Корхонаи воҳиди давлатии «Савдо ва бозорҳои шаҳри Душанбе» ба маблағи беш аз 37 ҳазор сомонӣ -10 тонна орди навъи якум,  4 тоннагӣ  картошка ва пиёз, 2 тоннагӣ сабзиву карам ва як тоннагӣ биринҷу, шакар ва равғани растанӣ ба зарардидагони офати табиии шаҳри Кӯлоб расонида шуд. Чанде пеш шаҳрдории Душанбе ба зарардидагон 185 ҳазор сомонӣ кӯмаки молиявии нақдӣ ва 90 тонна орд расонида буд. Инчунин, тибқи ин қарор дар асоси лоиҳаҳои дахлдори бо соҳибмулкон мувофиқашаванда, барои сокинони аз офат зарардидаи  шаҳри Кӯлоб, 120 манзили истиқоматии муҷаҳҳаз бо ашёи зист, ҳар кадоме бо арзиши 100 ҳазор сомонӣ то 1 сентябри соли 2010  ба маблағи беш аз 12 миллион сомонӣ  бунёд карда мешавад. Корҳои сохтмонӣ дар иншооти мазкур рӯзҳои наздик оғоз хоҳанд гашт. Ҳамзамон,  ҷиҳати таъминот бо оби ошомиданӣ ва нигаҳдошти вазъи санитарию эпидемиологии варзишгоҳи Марказии шаҳри Кӯлоб, ки  алҳол сокинони бесарпаноҳмонда, дар он ҷо муваққатан зиндагӣ мекунанд,  ду мошини махсуси коммуналии пойтахт  ба таври шабонарӯзӣ ба осебдидагон хизмат мерасонанд.