ЗАРАРИ БОРИШҲОИ НАВ

Душанбе,  14 май. (АМИТ «Ховар», Кристина  Эрлих). —  Баъди  чошти  дирӯз  дар  ҳудуди   деҳаи  Лолагии  ҷамоати  Вашгирди  ноҳияи  Файзобод  бар  асари  борони  шадид   сел  омад.  Бориш   ва  сел   сабаби  ҳалокати  сокини  ҳамин  деҳа  Раҳмоналӣ  Назаралиеви  10 – сола гардид. Мухбири  АМИТ «Ховар»  хабар  медиҳад, ки  дар   деҳаи  мазкур  якчанд  ҳавлӣ  зери об  монд. Дирӯз  инчунин  соати  21 – у 30  дақиқа  дар  натиҷаи  бориши  борон  таҳхонаи  якчанд  бинои   истиқоматиро  дар  деҳаи  Чимтеппаи   совхози  Варзоб  об  зер  кард.  Айни  ҳол   комиссияи  махсус  маблағи  зарарро  муайян  менамояд.  Шаби  13  май   дар  ноҳияи  Ҷомии   вилояти  Хатлон  низ   борон  борида,  сел  омад ва  ба  соҳаи  кишоварзӣ   зарари  калон  расонид.  Аз  ҷумла,  масоҳати  калони  киштзор  дар  хоҷагиҳои  ҷамоатҳои  Арал ва  ба  номи  50 – солагии  Тоҷикистон  зери об  монданд.  Дар  километри  81 – уми  роҳи  мошингарди  Ёвон — Ҷомӣ —  Уялӣ   тақрибан  300 метр  қитъаи  роҳ  хароб  гардид. Шаби  гузашта   инчунин  дар  шаҳри  Қӯрғонтеппа  борони  шадид  борид.  Сели  дар  натиҷаи  борон  омада,  якчанд  хонаро  дар  кӯчаи  Пушкин  зер  кард.  Барои  кашидани  об  аз  таҳхонаҳои биноҳои  кӯчаҳои  Пушкин  ва  Баҳор  мошинҳои  обкашии   идораи  сӯхторхомӯшкунӣ  истифода бурда  шуданд. Аз  рӯи  пешгӯии  ҳавошиносон  ҳавои  сербориш  дар  саросари  мамлакат  то  охири  моҳи  май  боқӣ  мемонад.