РӮЙХАТИ ИШТИРОКЧИЁНИ КОНФРОНСИ ОБ ПУРРА ШУД

Душанбе 4 июн, (АМИТ «Ховар» Лутфия Эшонқулова).-Намояндагони боз  20 давлат ва 15 ташкилоти байналмилалӣ ба рӯйхати иштирокчиёни Конфронси байналмилалӣ дохил гардиданд. 8-10 июни соли ҷорӣ дар шаҳри Душанбе «Конфронси байналмилалии сатҳи баланд оид ба баррасии фарогири миёнамӯҳлати татбиқи даҳсолаи «Об барои ҳаёт» 2005-2015» баргузор мегардад. Макони баргузории Конфронси об маҷмааи давлатии «Кохи сомон» интихоб гардидааст. Ёдовар мешавем, ки барои иштирок дар Конфронси сатҳи баланд аз номи Ҳукумати Ҷумҳурии Тоҷикистон ба роҳбарони 191 давлатҳои аъзои СММ, роҳбарони 20 ташкилоти СММ, зиёда аз 80 ташкилотҳои байналмиллаливу минтақавӣ, институтҳои молиявӣ, ҳамчунин 120 муассисаҳои олию илмӣ, олимон ва мутахассисони як қатор давлатҳои ҷаҳон даъватнома фиристода шудааст. «То имрӯз дар кори Конфронс иштироки намояндагони 70 давлати ҷаҳон ва 65 ташкилотҳои байналмиллалӣ тасдиқ шудааст»-дар ин бора котиби Конфронси байналмилалии об ба АМИТ «Ховар» хабар дод.