БОЙГОНИИ ФИЛМҲОИ БОЗГӮКУНАНДАИ ОФАТИ ТАБИӢ

   Душанбе,23 июл. (АМИТ «Ховар», Марҳабо Зунунова). — «Мо тамоми ҳодисаю  офатҳои табииеро, ки  солҳои охир   дар Тоҷикистон  рӯй додаанд, ба  лентаи  тасвир  бардоштем. Дар  бораи фоҷиаи  охирин- обхезии  моҳи майи соли  ҷорӣ дар шаҳри  Кӯлоб рухдода филми  ҳуҷҷатии 46 дақиқагӣ  бардоштаем, ки   дар нишасти   матбуотии ҳисоботии  охиринамон   манзури намояндагони ВАО-и  ватаниву хориҷӣ  гардонидем»,- гуфт ба  мухбири « Ховар»  сардори маркази  матбуоти   Кумитаи  ҳолатҳои  фавқулодда   ва мудофиаи  гражданӣ, капитан  Дӯстмурод Забиров.  « 7 майи  соли ҷорӣ  пас аз он ки  ба Кумитаи  ҳолатҳои  фавқулодда  хабари обхезӣ расид, ҳамаи  кормандони  маркази матбуот  дар қатори  аввалинҳо  ба  шаҳри  Кӯлоб    омаданд. Дар  соати 8-у 30 дақиқа  мо аллакай дар ҷойи   ҳодиса будем  ва ҳамаи  оқибатҳои  фоҷиаро ба  навор гирифтем:  хонаҳои харобгашта,  модарони  дар ғаму мотам нишаста, кори наҷотдиҳандагон ва дигар чизҳоро»,-ба ёд меорад  Д. Забиров. Қайд кардан   бамаврид аст, ки филми фоҷиаи Кӯлоб, ки  дар нишаст  намоиш дода шуд,  ба  намояндагони  ВАО  таъсири калон  расонид. Филми  мазкур  имкон медиҳад,ки  миқёси  фоҷиа  ва  амалиёти сохтору  идораҳои  дахлдор  дар ҳолатҳои  фавқулодда  пурра намоён гардад. Дар айни замон дар маркази  матбуот аллакай  бойгонии филмҳои  ҳуҷҷатӣ аз ҷойи ҳодисаю фоҷиа  ва офатҳои  табиӣ  мавҷуд аст. « Дар бойгонии  филмҳо 35  фитта, ки  ҳодисаю   офатҳои табииро  аз соли 2004 то  ин дам  дар бар  мегирад, 65  фиттаи  DVD, ки ҳодисаҳои  фавқулоддаро аз соли 2007-ум то  ба ин дам  фарогир аст,  мавҷуд мебошад.   Дар ин филмҳо  ҳамчунин  заминҷунбии Қумсангир ( соли 2006) , заминҷунбии  Рашт ( соли 2007),  заминҷунбии Ванҷ  ( соли 2010),  обхезии ноҳияи  Ҳамадонӣ  ( соли 2005), обхезии Кӯлоб ва Восеъ (соли 2010),  тармафароӣ  дар роҳи  Душанбе-Хуҷанд ( аз соли 2004 то  инҷониб) инъикос гардидаанд. Ҳамчунин мо  ҷасади ҳамаи   он нафаронеро,  ки   дар соли ҷорӣ дар  дарёҳо ғарқ  шудаанд, ба  навор гирифтаем»,- гуфт  Д.Забиров. Ёдовар мешавем, ки  маркази  матбуоти  Кумитаи  ҳолатҳои  фавқулодда ва  мудофиаи граждании ҶТ соли 1999 ташкил ёфтааст.