ГАРДИШИ САВДОИ ХОРИҶӢ БЕШ АЗ 1 МЛРД ДОЛЛАР

Душанбе, 20 июл. (АМИТ «Ховар», Лаззат Диловарзод).- Бино ба иттилои Агентии омори назди Президенти ҷумҳурӣ, гардиши савдои хориҷӣ дар нимсолаи аввали соли ҷорӣ ба 1 млрд. 688,6 млн. доллари амрикоӣ расид, ки он нисбат ба ҳамин давраи соли 2009 72,4 млн. доллари амрикоӣ зиёд  аст. Аз рӯи маълумоти  Агентии омори назди Президенти ҷумҳурӣ, баланси савдои ҶТ дар ин муддат манфӣ арзёбӣ гардида, 574,4 млн. долларро ташкил додааст. Ҷумҳурии Тоҷикистон дар нимсолаи аввали соли ҷорӣ муносибатҳои савдоии худро бо 87 давлати ҷаҳон аз ҷумла,  10 давлати ИДМ ва 77 давлати хориҷи дур ба роҳ мондааст. Маҳсулоти содиротии ҶТ дар моҳҳои январ – июни соли ҷорӣ 557,1 млн. доллари амрикоиро ташкил додааст. Дар содироти мол бартарии давлатҳои хориҷи дур бештар буда, он 86,9 фоизро ташкил медиҳад. Бино ба маълумоти Агентии омор, дар моҳҳои январ – июни соли 2010 содироти нерӯи барқ аз Тоҷикистон 91,9 фоиз кам гардидааст.