КИШВАРҲОИ УЗВИ МАГАТЭ ТАБОДУЛИ ТАҶРИБА МЕКУНАНД

Душанбе, 26 июл.(АМИТ «Ховар», Марзия Саидова).-26 июл дар шаҳри  Душанбе дар мавзуи «Идоракунии  бехатарии партовҳои радиоактивӣ ва  манбаъҳои ионзо» семинари 5- рӯзаи минтақавӣ оғоз ёфт. Директори Агентии  амнияти ядроӣ ва радиатсионии Академияи илмҳои Ҷумҳурии Тоҷикистон Ӯлмас Мирсаидов дар сӯҳбат ба хабарнигори АМИТ «Ховар» гуфт, ки  ҳадаф аз баргузории семинари минтақавӣ дар Душанбе баррасии амиқи масъалаҳои вобаста ба идоракунии бехатарии партовҳои  радиоактивӣ ва манбаъҳои ионзо, бахусус омӯзиш ва тартиби гӯронидани  манбаъҳои ионзо, тавлиди манбаъҳои ионзо буда, иштирокдорони семинар дар ин самт табодули таҷриба менамоянд. Семинари минтақавӣ бо ибтикори Агентии амнияти ядроӣ ва радиатсионии Академияи илмҳои Ҷумҳурии  Тоҷикистон дар ҳамкорӣ бо Агентии байналмилалӣ оид ба энергияи атомӣ (МАГАТЭ) созмон дода шуда, дар он  намояндагони беш аз 10 кишвари аъзои МАГАТЭ –Русия, Белорус, Қазоқистон, Қирғизистон, Украина, Арманистон, Гурҷистон, Молдова, Литва,  Эстония ва Ӯзбекистон иштирок доранд. Дар оғози кори семинар Директори Агентии амнияти ядроӣ ва радиатсионии Академияи илмҳои ҷумҳурӣ Ӯлмас Мирсаидов ба иштирокдорони ин чорабинӣ роҷеъ ба фаъолияти Агентӣ, корҳои муҳими дар ин самт ба анҷом расонидашуда дар ҳамкорӣ бо МАГАТЭ, санадҳои меъёрию ҳуқуқие, ки аз ҷониби парлумон дар мавриди партовҳои радиоактивӣ қабул шудааст ва таъмири партовгоҳҳои радиоактивӣ дар кишвар  ибрози назар кард. Зикр шуд, ки дар ин самт Ҷумҳурии Тоҷикистон дар ҳамкорӣ бо МАГАТЭ корҳои муҳимеро ба сомон расонидааст, ки яке аз онҳо таъмири партовгоҳи раиоактивӣ воқеъ дар ноҳияи Файзобод аст.