НАРХИ РОҲКИРО ДАР ПОЙТАХТ БАЛАНД МЕГАРДАД

Душанбе, 28 июл.(АМИТ «Ховар», Марзия Саидова).-«Дар назар аст, ки дар ояндаи наздик нархи роҳкиро дар нақлиёти ҷамъиятии мусофиркашонии пойтахт то 25 % баланд хоҳад гашт», гуфт зимни нишасти матбуотӣ ба хабарнигорон директори Муассисаи давлатии коммуналии «Душанбенақлиётхадамотрасон» Абдуҳомид Шералиев.  Мавсуф афзуд,  ки асосҳои иқтисодии ин масъаларо сохторҳои марбутаи пойтахт пурра баррасӣ карда, барои мувофиқа ба вазорату идораҳои  ваколатдори ҷумҳуриявӣ пешниҳод намудаанд. Абдуҳомид Шералиев зикр кард, ки нархи тарифҳое, ки дар нақлиёт истифода мешаванд,   қариб 50 % боло рафтааст. Ба ғайр аз ин нархи сӯзишворӣ, нерӯи барқ баланд гардида, нархи қисмҳои эҳтиётӣ, хусусан автошина ва аккумулятор майл ба болоравӣ доранд.  Аз ин рӯ, баланд шудани нархи роҳкиро дар нақлиёти мусофиркашонии пойтахт аз эҳтимол дур нест.