ПЕШНИҲОДИ ХУЛОСАИ ҲУҚУҚӢ БА 471 САНАД

Душанбе, 23 июл. (АМИТ «Ховар», Лаззат Диловарзод).- Вазорати адлияи Ҷумҳурии Тоҷикистон дар нимсолаи аввал дар  соҳаи ҳуқуқэҷодкунӣ  ба 477 лоиҳаҳои санадҳои меъёрю ҳукуқӣ ва 471 санадҳои ҳуқуқии хусусияти байналмилалидошта хулосаи ҳуқуқӣ пешниҳод намуд. Дар давраи ҳисоботӣ 53 санади меъёрии ҳуқуқии умумиҳатмӣ аз Вазоратҳои корҳои дохилӣ, маориф, тандурустӣ, Бонки миллии Тоҷикистон ва дигар вазорату идораҳо барои ба қайдгирии давлатӣ пешниҳод гардиданд, ки аз онҳо 23 санад ба қайди давлатӣ гирифта шуда, бақайдгирии 27 санади меъёрии ҳуқуқӣ рад карда шудааст. Дар конфронси матбуотие, ки ба  муносибати ҷамъбасти нимсолаи аввали соли ҷорӣ дар Маркази матбуотии ҷумҳуриявии «Иттилоот ва муошират» баргузор гардид,  сабаби рад намудани ин санадҳоро  ба қонунгузории амалкунанда  мухолифат доштани мазмуни алоҳидаи санадҳои меъёрии ҳуқуқӣ, риоя накардани техникаи ҳуқуқэҷодкунӣ, бе асоси қонунӣ қабул намудани санад ва аз доираи ваколатҳо баромадани мақоми қабулкунандаи он маънидод намуданд. Дар  ин муддат аз ҷониби вазорати адлия бевосита 25 лоиҳаи тағйиру иловаҳо ба қонунҳои ҷорӣ таҳия карда шуданд. Дар конфронси матбуотӣ ҳамчунин қайд гардид, ки бо мақсади баланд бардоштани маърифати ҳуқуқии аҳолӣ , мутахассисони соҳаи адлия бо аҳолӣ  791 вохӯрӣ гузаронида, тариқи воситаҳои ахбори умум беш аз 185 маротиба баромад намудаанд. Бо мақсади баландбардории тайёрии касбии довталабон ва ҷобаҷогузории дурусти  мутахассисон  дар давраи ҳисоботӣ,   3 маротиба озмун барои ишғоли мансабҳои холии  маъмурии хизмати давлатӣ гузаронида шудааст, ки дар натиҷа 25 нафар довталаб  ба кор қабул гардиданд. Сипас миёни хабарнигорон ва кормандони вазорат муколамаи ошкоро сурат гирифт ва то дараҷае хабарнигорон аз ин  тарзи баргузории конфронс    қаноатманд гардиданд.