СААД БА ҚИРҒИЗИСТОН КӮМАКИ ТАЪҶИЛӢ МЕРАСОНАД

Душанбе,  2 июл. (АМИТ «Ховар», Дилшода  Ҷавонмардова). —  Президенти  Ҷумҳурии  Тоҷикистон  Эмомалӣ  Раҳмон  имрӯз  бо  Муншии  умумии  Созмони  аҳдномаи  амнияти  дастаҷамъӣ   Николай  Бордюжа  мулоқот  кард. Н.Бордюжа  баъди  анҷоми  мулоқоташ  бо  Президент зимни  сӯҳбати  мухтасар  бо  хабарнигорон  дар  бораи   мавзӯъҳои  муҳокимашуда  сухан  ронд. Вай  иброз дошт, ки  дар  ҷараёни  сӯҳбат  аз  ҷумла  вазъияти  имрӯзаи  Ҷумҳурии  Қирғизистон  баррасӣ  карда  шуд. Муншии  умумии  СААД хабар  дод, ки  Президенти  Тоҷикистон  дар  бораи  расонидани  кӯмакҳои таъҷилӣ  ба  Қирғизистон  қарори  махсус  имзо  кард.  Қарори  мазкурро   котибони Шӯрои  амнияти  СААД  пешниҳод  карда буданд. Ҳадафи  он  расонидани  кӯмак  ба  мақомоти  муҳофизи  қонуну  тартиботи  Ҷумҳурии  Қирғизистон  ва дастгирии онҳо   дар  масъалаи  таъмини   вазъи  мӯътадили  қисмати  ҷанубии  мамлакат  мебошад. Ба  қавли  Н.Бордюжа,  зимни  сӯҳбат  тадбирҳои  дигаре  низ   мавриди баррасӣ  қарор  гирифтанд, ки  ҳадафи онҳо  таҳкими   сулҳу  субот  дар  Қирғизистон  мебошад. Н.Бордюжа   аз  сатҳи  ҳамкории   Тоҷикистон  бо   СААД  ва муносибатҳои   Сарвари давлати  Тоҷикистон  бо   тадбирҳои   созмон  барои  ҳалли  проблемаҳои  бамиёномада  изҳори  қаноатмандӣ  намуд.