ТАҲЛИЛИ СИЁСАТИ БОНК ДАР МАСЪАЛАИ РОБИТА БО ҶОМЕА

Душанбе, 21  июл. (АМИТ «Ховар», Пайрав  Назаров). – Мутахассисони  Бонки  Рушди  Осиё  рӯзҳои  20 ва  21  июли  соли  равон дар  Душанбе  бо  мақсади таҳлили  сиёсати  бонк дар  масъалаи  робита бо  ҷомеа  семинарҳо  баргузор  сохтанд. Дар  онҳо  намояндагони  ҳукумат,  марказҳои   амалӣ  сохтани  барномаҳо,  созмонҳои  ғайридавлатӣ,  воситаҳои  ахбори оммавӣ  ва  аҳли  ҷамъият  ширкат  варзиданд. Мухбири  АМИТ «Ховар»  хабар  медиҳад, ки  сиёсати робита бо  ҷомеаи Бонки  Рушди  Осиё   моҳи  сентябри  соли  2005  қабул  карда шуда буд.  Сиёсати  мазкур  ҳуқуқи  одамонро  ба  гирифтан  ва  додани  маълумот  ҳимоя  карда,  ба  дастрас  намудани  маълумоти  корӣ,  пешниҳод  кардани  ҳисобот  ва  шаффофияти  фаъолияти  бонк  мусоидат  менамояд.  Намояндаи  доимии  Бонки  Рушди  Осиё  дар  Тоҷикистон Макото Оҷиро  зикр  намуд, ки Бонки  Рушди  Осиё  созмони  байналмилалии  рушд  буда,  бояд  ба  аҳли  ҷамъият  дар  бораи  фаъолияти  худ  мунтазам  маълумот  диҳад.   Ҳадафи  семинарҳо  ба  ҳамаи  тарафҳои  манфиатдор  додани  имконияти  беҳтар  сохтани  самараи  фаъолияти  сиёсати  бонк  дар  масъалаи  робита бо  ҷомеа  мебошад. Хабар  дода  мешавад, ки  мутахассисони  бонк  Делфин Рош  ва Шамала  Абейратне  барои гузаронидани  семинарҳо  ба  Тоҷикистон  омаданд. Тоҷикистон  соли  1998  узви  Бонки  Рушди  Осиё  гардида,  то  имрӯз   аз он  ба  маблағи  қариб  570 миллион  доллари  ИМА  қарзи  имтиёзнок,  кӯмаки техникӣ  ва  кӯмакпулӣ  гирифтааст. Бонки  Рушди  Осиё  ният  дорад, ки  соли  2010  ба  Тоҷикистон  ба  маблағи 150  миллион  доллари  ИМА  кӯмак  расонад. Маблағи  мазкур  барои беҳтар  сохтани  вазъияти  соҳаи  энергетика  ва рушди  сектори  хусусӣ  сарф  карда  мешавад.