ВАЗЪИ МАЪЮБОН ДАР ТОҶИКИСТОН

Душанбе, 6 июл. (АМИТ «Ховар», Лаззат Диловарзод).- Ҳамасола дар ҷумҳурӣ 8 – уми июл чун Рӯзи маъюбон ва пиронсолон ҷашн гирифта мешавад. Бо мақсади сари вақт ва босамар амалӣ гаштани ҳуқуқ ва манфиатҳои маъюбон ва пиронсолон дар ҷумҳурӣ 5 хона- интернати пиронсолон ва маъюбон, 2 хона – интернати беморони касалиҳои рӯҳӣ ва «Маркази миллии тавонбахшӣ барои кӯдакон ва наврасони «Чорбоғ», 6 маркази минтақавии хизматрасонӣ ба пиронсолону маъюбон, заводи протезию ортопедӣ бо филиалҳояш  дар шаҳрҳои Кӯлоб, Хоруғ ва Хуҷанд, Муассисаи давлатии «Пажӯҳишгоҳи ташхис ва барқарорсозии қобилияти кории маъюбон бо табобатгоҳҳо», 4 муассисаи истироҳатию табобатӣ ва 1 Муассисаи давлатии «Литсеи касбии махсуси маъюбон» фаъолият доранд. Ҳама ин аз ғамхорӣ ва дастгирии Ҳукумати ҷумҳурӣ дар бораи  маъюбон ва пиронсолон гувоҳӣ медиҳад,- иброз доштанд дар Вазорати меҳнат ва ҳифзи иҷтимоии аҳолӣ   ба мухбири АМИТ «Ховар».