ҚУВВАОЗМОИҲОИ ИНТИХОБИИ БОЗИҲОИ ОЛИМПӢ СОЛИ 2012 ШУРӮЪ МЕШАВАНД

Душанбе, 16 август. (АМИТ «Ховар», Пайрав Назаров).- Қувваозмоиҳои нахустини интихобии Бозиҳои олимпии соли 2012 аз аввали соли 2011 оғоз меёбанд. Мухбири АМИТ «Ховар» хабар медиҳад, ки 35 дастаи миллии футболи мамлакатҳои гуногун барои иштирок дар бозиҳои олимпии соли 2012 ариза пешниҳод кардаанд.  Дар байни онҳо дастаи миллии олимпии Ҷумҳурии Тоҷикистон низ ҳаст. Дастаи миллии футболи Тоҷикистон қувваозмоиҳои нахустини худро аз аввали соли 2011 оғоз менамояд. Дар оғози соли оянда 22 даста бо ҳамдигар қувваозмоӣ хоҳанд кард. 11 дастаи ғолиб рӯйхати 13 дастаи боқимондаи мунтахабро пурра мекунад. Дар даври дуюми қувваозмоиҳо 12 ҷуфти дастаҳо қувваозмоӣ хоҳанд кард. Баъдан аз рӯи натиҷаҳои даври дуюм бо роҳи қуръапартоӣ дастаҳои миллӣ ба се гурӯҳ ҷудо карда хоҳанд шуд. Даври аввали қувваозмоиҳо 23 феврали соли 2011 оғоз меёбад. Ҳамон рӯз бозии нахустини интихобӣ гузаронида мешавад. Ёдовар мешавем, ки дастаи мунтахаби олимпии футболи Тоҷикистон таҳти роҳбарии сартренер Шариф Назаров моҳи июни соли 2010 дар доираи тайёрӣ ва қувваозмоиҳои интихобӣ дар Ҷумҳурии Мардумии Чин машқ мекунад. Футболбозони тоҷик дар ҷараёни машқ бо дастаи мунтахаби ин мамлакат қувваозмоӣ карданд. Қувваозмоии мазкур бо ҳисоби калони 0:4 ба фоидаи футболбозони чинӣ анҷом ёфт.