РИОЯИ ТАНЗИМИ РАСМУ ОИНҲО ДАР ШАҲРИ ВАҲДАТ

Ваҳдат,10 август.(АМИТ»Ховар»,Зебо Давлатова).-Тибқи иттилои   мудири бахши танзими анъана ва ҷашну маросимҳо дар шаҳри Ваҳдат Давлаталӣ Бегов кормандони  бахши мазкур ҷиҳати дар амал татбиқ намудани Қонуни Ҷумҳурии Тоҷикистон «Дар бораи танзими  анъана ва ҷашну маросимҳо дар Тоҷикистон» корҳои зиёдро ба анҷом расониданд. Дар ин давра 3653 ҷашну маърака,аз ҷумла 200 хатнасӯр,2184 тӯйи домодию арӯсӣ ,447 маросими  дафн,308 маросими чил ва 336 маросими сол гузаронида шуд,ки дар ин маъракаҳо 608 чорвои калон ва 1674 чорвои хурд забҳ гардид. Маблағи умумии хароҷот 9 миллиону 608 ҳазору 815 сомониро ташкил медиҳад,ки ба ҳар як маърака 2630 сомонигӣ рост меояд. Давлаталӣ Бегов афзуд,ки баҳри бартараф намудани камбудию норасоиҳо, ба қонуншиканиҳо роҳ надодани шаҳрвандон аз ҷониби масъулини шаҳри Ваҳдат комиссияи махсус фаъолият карда истодааст.Ҳар рӯзи сешанбе дар якҷоягӣ бо намояндаи мақомоти маҳаллӣ  ва масъулини ҷамоатҳои деҳот дар бораи танзими анъана ва ҷашну маросимҳо бо шаҳрвандон сӯҳбат гузаронида мешавад.