АДИБОНИ СУҒД БО НИШОНҲОИ ФАХРӢ ҚАДР ШУДАНД

Душанбе, 29 сентябр. (АМИТ «Ховар», Бекназари Абӯбакр). -28 сентябри соли ҷорӣ дар Кохи фарҳанги «Рӯдакӣ»-и шаҳри Хуҷанд машварати ҷумҳуриявии адибони ҷавон ба кори худ шурӯъ намуд, ки дар он раиси вилояти Суғд Қоҳир Расулзода иштирок ва суханронӣ намуд. Қоҳир Расулзода зимни суханронӣ мақому манзалати зиёиён, аҳли адабу илмро дар ҷодаи таҳкими давлатдорӣ, созандагию худшиносии миллӣ, рушди маънавиёт ва фарҳанги муосири тоҷикон нек арзёбӣ намуда, ба чанде аз адибону олимони вилоят Сипосномаҳои мақомоти иҷроияи ҳокимияти давлатии вилояти Суғдро тақдим дошт. Раиси Иттифоқи нависандагони Тоҷикистон Меҳмон Бахтӣ дар суханронияш аз ҳадафҳои баргузории анҷуман-машварати ҷумҳуриявии адибони ҷавон, масъалаҳои марбут ба адабиёту ҳунар ҳарф зада, ба чанд нафар шоирону нависандагони вилоят нишонҳои ҷоизаи «Сухан», Аълочии фарҳанги Ҷумҳурии Тоҷикистон ва Ифтихорномаи Иттифоқи нависандагони Тоҷикистонро тақдим дошт. Аз ҷумла, адибон ва зиёиён Мубинҷон Юсуфов, Усмонҷон Ғаффоров, Дадоҷон Раҷабӣ, Абдуҳаким Шарифов, Саидамин Ҷило, Аюб Кенҷа,  Озарахш, Урунбой Усмонов, Нарзулло Азизиён ва Маҳваш ба унвону мукофотҳо сазовор гардиданд.