ҶАШНВОРАИ ХУШНАВИСОН

Душанбе, 12 октябр. (АМИТ «Ховар», Дилшодаи Ҷонмард).- Аз маркази матбуоти Вазорати фарҳанг ба АМИТ «Ховар» хабар доданд, ки 13 октябр дар толори маҷлисгоҳи Вазорати фарҳанги Ҷумҳурии Тоҷикистон маросими ифтитоҳи нахустин Ҷашнвораи хушнависии ЭКО бо ҳузури мақомоти Тоҷикистон, сафирон, намояндагиҳои байналмилалӣ ва шахсиятҳои фарҳангӣ баргузор мегардад. Дар он ҳунари хушнависон аз давлатҳои Эрон, Афғонистон, Покистон, Туркия, Қирғизистон, Қазоқистон ва Тоҷикистон муаррифӣ карда мешавад. Бояд тазаккур дод, ки ин чорабинӣ бо ибтикори Вазорати фарҳанги Ҷумҳурии Тоҷикистон ва муассисаи фарҳангии ЭКО созмон дода шудааст. Дар назар аст, дар маросими ифтитоҳи нахустин Ҷашнвораи хушнависии ЭКО Вазири фарҳанги Тоҷикистон Мирзошоҳрух Асрорӣ ва Раиси  Муассисаи фарҳангии ЭКО Ҳуҷатуллоҳи Аюбӣ иштирок ва баромад хоҳанд намуд. Дар нимаи дуюми ҳамон рӯз дар осорхонаи ба номи Камолиддини Беҳзод ифтитоҳи намоишгоҳи осори хушнависони кишварҳои узви ЭКО оғоз меёбад. Бояд қайд намуд, ки Намоишгоҳи хушнависии ЭКО тӯли ду ҳафта- аз 13 то 27 октябри соли равон идома меёбад.