БАҲСРО БОЙ ДОДАНД

   Душанбе, 5 октябр. (АМИТ «Ховар», Лаззат Диловарзод).- Аз Хадамоти давлатии ташхиси тиббию иҷтимоии аҳолӣ ба мухбири АМИТ «Ховар» иттилоъ доданд, ки барои муайян кардани беморон ва ба онҳо додани гурӯҳи маъюбӣ дар ҷумҳурӣ 17 комиссия амал мекунад, ки аз ин 9 комиссия дар вилояти Суғд ва 8 комиссия дар вилояти Хатлон ба ташхиси беморон машғуланд.   Тибқи маълумоти ҳамин манбаъ, бемороне, ки ба хулосаи комиссияи экспертии тиббии меҳнат — (ВТЭК) дар шаҳру ноҳияҳо розӣ нестанд, ба Хадамоти давлатии ташхиси тиббию иҷтимоии аҳолии Вазорати меҳнат ва ҳифзи иҷтимоии аҳолии Ҷумҳурии Тоҷикистон муроҷиат менамоянд.   Боиси тазаккур аст, ки танҳо дар давоми 6 моҳи соли ҷорӣ аз рӯи баҳсҳо оид ба гурӯҳҳои беморӣ 1 ҳазору 169 нафар аз гирифтани гурӯҳи маъюбӣ маҳрум карда шуда, сардорони шӯъбаҳои комиссияҳои экспертии тиббии меҳнат (ВТЭК) –и шаҳру ноҳияҳое, ки ба ин сохтакорӣ роҳ додаанд, сахт огоҳонида шуда чанд нафарашон аз кор сабукдӯш гардиданд.