ФАСОД ВА ЗАРАРИ МОЛИЯВИИ ОН

  Душанбе, 26 октябр. (АМИТ «Ховар», Мавзуна Бойева)- Дар рафти тафтишоти молиявӣ дар фаъолияти вазорату кумитаҳо ва сохторҳои тобеи онҳо низ камбудию норасоиҳои ҷиддӣ ошкор карда шуд. Аз ҷумла, дар 38 сохтори тобеи Вазорати энергетика ва саноати ҶТ 7,3 миллион сомонӣ  зарари молиявӣ ошкор карда шуд. Дар корхонаи воҳиди давлатии «Востокредмет» ва «Заря Восток»-и вилояти Суғд тафтиш зарари молиявиро ба маблағи зиёда аз 3 миллиону 600 ҳазор сомонӣ ошкор намуд, ки дар рафти тафтиш 1 миллиону 545 ҳазор сомони он барқарор шуд, чунин ибрози назар намуд ба хабарнигорони васоити ахбори омма, имрӯз директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон Фаттоҳ Саидов.                 Тафтиш, инчунин, дар сохторҳои Вазорати мелиоратсия ва захираҳои оби ҶТ камбудиҳои ҷиддиро ошкор намуд.             Чунончи дар Корхонаи воҳиди давлатии «Хуҷандобуканал»-и вазорати номбурда тафтиш зарари молиявиро ба маблағи  3121,ҳазор сомонӣ муайян намуд. Аз ин маблағ дар рафти тафтиш 253 ҳазор сомонӣ барқарор карда шуд.             Ӯ, ҳамчунин, қайд кард, ки натиҷаи тафтишу санҷишҳои молиявӣ дар вазорату идораҳо, мақомоти маҳалии ҳокимияти давлатӣ ва корхонаву муассисаҳо мавриди баррасӣ қарор гирифта, муҳокимаи пешниҳоди ирсолгардида бо иштироки кормандони Агентӣ сурат гирифт. Дар натиҷа нисбат ба 1085 нафар шахсони масъул барои камбудиҳои содиркардаашон муҷозоти интизомӣ ва моддӣ татбиқ шуда, 46 нафари онҳо аз вазифаашон озод шудаанд, гуфт дар хотима Ф.Саидов.