НАҚШИ «КАРИТАC» ДАР ҲАЁТИ МАРДУМ

  Мӯъминобод, 26 октябр. (АМИТ «Ховар», Сулаймон Холов).- Дар доираи муносибатҳои ҳасанаи Ҷумҳурии Тоҷикистон бо соири давлатҳои ғарбу шарқ роҳбарияти ноҳияи Мӯъминобод ҳамкориро бо ташкилотҳои гуногуни байналхалқӣ хуб ба роҳ монда, аксари деҳаҳоро бо оби нӯшокӣ, хатти барқ ва техникаи хоҷагии қишлоқ таъмин намудаанд. Дар ҳамин замина ташкилоти «Каритас»-и Швейтсария тӯли даҳ соли фаъолият дар ноҳия дар беҳбудии сохтори деҳот, таъмини аҳолӣ бо оби нӯшокӣ ва техника, ташкили ҷойҳои нави корӣ, ҷалби бештари занон ба шуғли доимӣ саҳм гузоштааст. Дар ҷамъбасти фаъолияти даҳсолаи ин ташкилот дар ноҳияи Мӯъминобод роҳбарияти мақомоти иҷроияи ҳокимияти маҳалии ноҳия, аъзои хоҷагиҳои деҳқонӣ, асотсиатсияҳои истифодабарандагони об иштирок намуданд. Зимни ин ҷамъомад зикр гардид, ки сохторҳои дар ин давра созмондодашуда минбаъд низ фаъолияти худро мустақилона идома дода, барои беҳтар гардидани шароити зисти аҳолӣ мекӯшанд.