САФАРИ ҲАЙАТИ ВАО-И ТОҶИКИСТОН БА ХОРИҶА

       Душанбе, 20 октябр.(АМИТ «Ховар», Марзия Саидова).-Ҳайати намояндагони васоити ахбори  оммаи Тоҷикистон ҷиҳати иштирок дар 17-умин намоишгоҳи байналмилалии матбуот ва хабаргузориҳо, ки муддати 10 рӯз -аз 25 октябр то 3 ноябр дар Теҳрон баргузор мегардад, ба ин кишвар сафар мекунанд.      Намояндаи масъули бахши матбуот ва фарҳанги Сафорати Эрон дар Душанбе Ҳусайн Ширхонӣ ба АМИТ «Ховар» иттилоъ дод, ки ҳайати ВАО-и Тоҷикистон, ки аз 15 нафар сармуҳаррирону ноибони сармуҳаррирони нашрияҳои «Имрӯз Нюз», «Наҷот», «Курьер Таджикистана», «Минбари халқ», «Ҷавонони Тоҷикистон», «Азия -плюс», «Садои мардум», «Адабиёт ва санъат», «Ҷумҳурият», «Чархи гардун»,  хабаргузории АМИТ «Ховар» ва маҷаллаи «Фирӯза» иборат аст, 23 октябр ба Эрон мераванд.         Мақсад аз баргузории намоишгоҳ тавсеаи ҳамкориҳо байни васоити ахбори оммаи кишварҳои минтақа ва ҷаҳон буда, намояндагони ВАО таҷриба ва фаъолияти худро муаррифӣ месозанд. Интизор меравад, ки дар намоишгоҳ намояндагони ВАО-и 60 кишвари ҷаҳон иштирок хоҳанд кард.    Дар назар аст, ки ҳайати намояндагони ВАО-и Тоҷикистон бо вазири корҳои хориҷии Эрон Манучеҳри Муттакӣ ва вазири фарҳанги ин кишвар Ҳусайнӣ мулоқот карда, бо фаъолияти симо ва садои Эрон ва бархе аз нашрияҳои он шинос мегарданд. Инчунин, боздид аз осори таърихию фарҳангии шаҳрҳои Шерозу Исфаҳон ва Теҳрон дар назар дошта шудааст.