ҚАРЗДОРӢ ОШКОР ГАРДИД

Душанбе, 11 ноябр. (АМИТ «Ховар», Лаззат Диловарзод).- Бино ба иттилои мудири бахши робита бо ҷомеаи Вазорати меҳнат ва ҳифзи иҷтимоии аҳолӣ Ф. Фозилов, аз аввали соли ҷорӣ то имрӯз  бо дахолати Хадамоти давлатии назорат дар соҳаи меҳнат, шуғл ва ҳифзи иҷтимоии аҳолии вазорати мазкур 33 млн. 700 ҳазор сомонӣ қарз аз музди меҳнат дар ҳамаи соҳаҳо   ошкор ва пардохт  шуд. Аз ин 10 млн. 316 ҳазор сомонӣ маблағҳои аз ҳисоби оморӣ пинҳондошта ва 23 млн. 384 ҳазор сомонӣ маблағҳои қарзҳоеанд, ки дар  маълумоти оморӣ  сабт шудаанд.    Дар натиҷаи чораҳои андешидаи вазорат ва мақомоти иҷроияи ҳокимияти давлатии вилоятҳо, шаҳру ноҳияҳои ҷумҳурӣ вазъи қарздорӣ нисбат ба ҳамин давраи соли гузашта коҳиш ёфтааст.    Маблағи қарз дар соҳаи сохтмони ҷумҳурӣ дар тӯли се сол аз 6,4 фоиз то 26, 9 фоиз  ва дар саноат аз 11 фоиз то 18,5 фоиз боло рафтааст, ки боиси нигаронист.    Аз вазъияти мавҷуда бармеояд, ки дар натиҷаи таъсири бӯҳрони молиявӣ  бештар корхонаву муассисаҳои саноатӣ ва истеҳсолӣ ба мушкилоти пардохти  музди меҳнат мувоҷеҳ шудаанд.