ҲАМОИШ ОИД БА МУҲОҶИРАТИ МЕҲНАТӢ

Суғд, 3 ноябр.(АМИТ «Ховар», Самад Юсуфӣ).-Имрӯз дар   маҷлисгоҳи Донишгоҳи ҳуқуқ, бизнес ва сиёсати Тоҷикистон ҳамоиши байналмилалӣ таҳти унвони «Пули муҳоҷиратии байни Осиёи Марказӣ ва Русия: таъсири бӯҳрони иқтисодӣ ва дурнамои инкишоф»  корашро оғоз намуд. Дар ҳамоиш олимони варзида аз кишварҳои Русия,Ҷопон, Эрон, Қазоқистон ва Тоҷикистон ширкат доранд. Ҳадаф аз иштироки муҳаққиқону коршиносон аз давлатҳои хориҷи дур, аз қабили Ҷопон, дар кори конфронси мазкур аз он иборат  аст, ки масъалаҳои марбут ба муҳоҷирати меҳнатӣ имрӯз ба мушкилоти на танҳо минтақавӣ, балки ба проблемаи сатҳи ҷаҳонӣ мубаддал гардидааст. Ба ақидаи онҳо, ҳалли масъалаҳои муҳоҷирати меҳнатӣ  аслан ҳалли масоили сиёсӣ, иқтисодӣ ва иҷтимоии давлатҳо мебошад. Ҳамоиши байналмилалӣ    фардо низ кори худро дар се бахш идома медиҳад.