МУЛОҚОТИ М.НЕЪМАТОВ БО ШАЙХ АҲМАД АЛ ФАҲАД АЛ САБАҲ

       Душанбе, 12 ноябр. (АМИТ «Ховар», Дилшодаи Ҷонмард).- Имрӯз дар шаҳри Гуанҷоуи Ҷумҳурии халқии Хитой дар ҳошияи Бозиҳои Осиёгии Гуанҷоу — 2010 мулоқоти Маликшо Неъматов, раиси Кумитаи ҷавонон, варзиш ва сайёҳии Ҷумҳурии Тоҷикистон, ноиби аввали Президенти Кумитаи миллии олимпии Тоҷикистон бо Шайх Аҳмад ал Фаҳад ал Сабаҳ Президенти Шӯрои олимпии Осиё баргузор гардид. Дар мулоқот Маликшо Неъматов ба Президенти Шӯрои олимпии Осиё аз номи роҳбарияти Кумитаи миллии олимпии Тоҷикистон барои ҳамкориҳои мутақобилан судманд изҳори миннатдорӣ намуд. Иброз гардид, ки ҷонибҳо омодаанд дар оянда барои рушди ҳаракати олимпӣ ҳамкориҳоро вусъат бахшанд. Президенти Шӯрои олимпии Осиё қабул гардидани Рустами Эмомалӣ ноиби Президенти Федератсияи футболи Тоҷикистонро ба ҳайси аъзои кумитаи муносибатҳои байналмилалии Шӯрои Олимпии Осиё, ки ин дар оянда метавонад барои рушди варзиш дар Осиё, аз ҷумла дар Тоҷикистон саҳми муносиб гузорад, ҳамчун эътироф ва эҳтироми Шӯрои олимпии Осиё аз сиёсати давлати Тоҷикистон маънидод намуд.