ПАРЧАМАТ ПАРАФШОН БОД, ТОҶИКИСТОНАМ!

Душанбе, 11 ноябр.(АМИТ «Ховар», Марзия Саидова).-24 ноябри соли 2010 дар кишварамон Рӯзи Парчами  Ҷумҳурии Тоҷикистон ҷашн гирифта мешавад. Бо мақсади дар сатҳи баланд таҷлил намудани ин санаи муқаддас дар пойтахти ҷумҳурӣ,  Раиси  шаҳри Душанбе Маҳмадсаид Убайдуллоев қарор ба тасвиб расонд. Тибқи он нақшаи чорабиниҳои шаҳрдории Душанбе ҷиҳати  таҷлили Рӯзи Парчами Ҷумҳурии Тоҷикистон тасдиқ гардид.  Аз ҷумла,  рӯзҳои 23-24 ноябри соли равон  дар китобхонаи шаҳрии ба номи Абулқосим Лоҳутӣ ва китобхонаи муосири пойтахт  намоиши китобҳо ва конфронсҳои илмӣ гузаронида мешаванд. Инчунин, дар Боғҳои фарҳангу фароғатии ба номи С. Айнӣ, «Дӯстии халқҳо» ва «Кӯли ҷавонон» сайругашти оммавии шаҳрвандон, намоиш ва фурӯши маҳсулоти қаннодӣ ташкил мешавад.   Майдони «800-солагии Маскав яке аз марказҳои асосии таҷлили Рӯзи парчами Ҷумҳурии Тоҷикистон буда, дар ин ҷо 24 ноябр таҳти унвони «Парчамат парафшон бод, Тоҷикистонам»  барномаи фарҳангӣ гузаронида мешавад. Инчунин,  чорабинии оммавии варзишии велосипедронӣ (веломарафон) бо либосҳои дорои рамзи Парчами Ҷумҳурии Тоҷикистон тибқи хатсайри муайян, гузаронидани дарсҳои тематикӣ, вохӯриву сӯҳбат дар мавзӯи Парчами Ҷумҳурии Тоҷикистон дар мактабҳои таҳсилоти умумӣ ташкил  мешавад.   Ҳамзамон, дар Рӯзи Парчами Ҷумҳурии Тоҷикистон дар тамоми нақлиёти мусофиркашонии шаҳрӣ парчами давлатӣ насб  шуда, ронандагон бо нишонаҳо, ки дар он парчами давлатӣ тасвир ёфтааст,  таъмин мегарданд.