РУСИЯ БА Қ. РАСУЛЗОДА МЕДАЛИ ТИЛЛОӢ ДОД

Душанбе, 11 ноябр. (АМИТ «Ховар», Покиза Маҳмадбекова). — Ҷонишини аввали раиси комиссияи муносибатҳои байналмилалии Ҳизби «Единая Россия» («Русияи ягона») Николай Бухонин аз номи Раёсати Шӯрои Ассамблеяи халқҳои Федератсияи  Русия ба Раиси вилояти Суғд Қоҳир Расулзода барои саҳми арзандааш дар мустаҳкам намудани дӯстии халқҳои Тоҷикистону Федератсияи Русия, посдорӣ ва густариши фарҳанги волои халқҳои собиқи шӯравӣ дар вилоят диплом ва медали тиллоии Шӯрои мазкурро  тақдим намуд. Халқҳои Федератсияи Русия ва Тоҷикистон бо ҳам дӯсту бародар буда, тибқи сиёсати оқилонаи роҳбарони ин ду давлат равобиту  ҳамкориҳо дар соҳаҳои мухталиф  густариш меёбанд. Раиси вилояти Суғд барои чунин таваҷҷӯҳ ва қадрдонӣ ба намояндагони Федератсияи Русия арзи сипос намуда, зикр дошт, ки  робитаҳои иқтисодӣ ва илмию фарҳангӣ миёни Федератсияи Русия ва Тоҷикистон, аз ҷумла минтақаҳои он ва вилояти Суғд минбаъд ривоҷу равнақ хоҳанд ёфт.