ТАҚСИМОТИ ҒАЙРИҚОНУНИИ ЗАМИН АЗ БАЙН МЕРАВАД

Душанбе, 12 ноябр. (АМИТ «Ховар», Лаззат Диловарзод).- Омӯзиши масъала оид ба қонуншиканиҳо дар тақсимоти замин нишон дод, ки айни замон дар ҳудуди ноҳияи Рӯдакӣ 25 ҳазор нафар сокини ноҳия ба қитъаи замини наздиҳавлигӣ эҳтиёҷ доранд.    Тибқи ҳисобҳои пешакӣ (то давраи баҳисобгирии аҳолӣ дар соли 2010) дар ноҳия зиёда аз 350 ҳазор нафар аҳолӣ зиндагӣ доранд, ки бештар аз 30 фоизи онҳо  аз 3 – 4 оилаи  дар як  ҳавлӣ  якҷоя умр ба сар мебурдагӣ иборатанд,- гуфт раиси ноҳия Мансур Қодиров ба мухбири АМИТ «Ховар».    Айни замон барои таъмини аҳолӣ бо ҷойи зист оид ба ҷудо намудани қитъаҳои замини назди ҳавлигӣ  аз ҳисоби заминҳои барои кишту чарогоҳ нобобу камҳосил маводи зарурӣ ба Ҳукумати Ҷумҳурии Тоҷикистон  пешниҳод гардидааст. Дар ҳолати аз ҷониби ҳукумати ҷумҳурӣ дастгирӣ ёфтани пешниҳоди ҳукумати ноҳия омили асосии даст задан ба тақсимоти ғайриқонунии замин аз байн меравад.