ТОҶИК ВАКИЛИ ПАРЛУМОНИ ҚИРҒИЗИСТОН

Душанбе, 12 ноябр. (АМИТ «Ховар», Пайрав Назаров).- Дар Сафорати Ҷумҳурии Тоҷикистон дар Ҷумҳурии Қирғизистон мулоқоти Сафири ҶТ Асомуддин Саидов бо раиси Ассотсиатсияи тоҷикони Қирғизистон, иҷрокунандаи вазифаи раиси Ассамблеяи халқии Қирғизистон, вакили Ҷогорку Кенеш аз ҳизби «Ата-Макен» Равшанбек Собиров баргузор гардид. Дар чаҳорчӯби мулоқот Асомуддин Саидов пеш аз ҳама Равшанбек Собировро барои вакили  мақоми қонунгузор интихоб гардиданаш, ки ин  лаҳзаи хотирмон ба шумор меравад, табрик намуда, дар фаъолияташ комёбиҳо таманно намуд. Ин ҳодиса ҳам барои Қирғизистон ва ҳам барои Тоҷикистон бори аввал аст ва Равшанбек Собиров якумин тоҷикест, ки дар таърихи Қирғизистони соҳибистиқлол вакили парлумони ин кишвар интихоб гардидааст.    Сипас мубодилаи афкор оид ба масоили таҳкими ҳамкории минбаъдаи дуҷониба доир гардид. Равшанбек Собиров иброз намуд, ки ғайр аз масъалаҳое, ки дар парлумон баррасӣ мешаванд, дар оянда баҳри мустаҳкамгардии муносибатҳои Қирғизистону Тоҷикистон, ҳамчунин, рушди фарҳанги тоҷикон дар Қирғизистон  кӯмаки худро мерасонад.