СОЗИШНОМАИ МАДРИДРО ПАРЛУМОН БАРРАСӢ КАРД

   Душанбе, 4 январ(2011).(АМИТ «Ховар», Марзия Саидова).- Масъалаи ҳамроҳ шудани Ҷумҳурии Тоҷикистон ба Протоколи Созишномаи Мадрид дар бораи бақайдгирии байналмилалии тамғаҳо 4 январ дар ҷаласаи Шӯрои Маҷлиси намояндагон, ки таҳти раёсати Раиси Маҷлиси намояндагон Шукурҷон Зуҳуров доир гардид, баррасӣ шуд.    Дар ҷаласаи Шӯро ҳамчунин лоиҳаи Қонунҳои Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи рамзҳои давлатии Ҷумҳурии Тоҷикистон», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи маориф», «Дар бораи ворид намудани тағйиру иловаҳо ба Кодекси меҳнати Ҷумҳурии Тоҷикистон» ва «Оид ба ворид намудани илова ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2010» мавриди баҳсу баррасии аъзои он қарор гирифтанд.   Раисони кумитаҳои Маҷлиси намояндагон зимни тавзеҳи масъалаҳои зикршуда гуфтанд, ки мақсади асосии лоиҳаи қонунҳо амалӣ намудани ислоҳоти соҳаи маориф, беҳтар ба роҳ мондани фаъолияти тамоми муассисаҳои таълимӣ, таъмини аҳолӣ бо ҷойи кори доимӣ, ташкили ҷойҳои холии корӣ ва тақвияти ҳамкориҳои байни Ҳукумати Ҷумҳурии Тоҷикистон бо Созмон ва ташкилоти байналмилалӣ мебошад.