ВУСЪАТИ КОРҲОИ СОХТМОНӢ ДАР ҒОНЧӢ

     Душанбе, 4 январ. (АМИТ «Ховар», Мавҷуда Анварӣ).-Дар ноҳияи Ғончӣ бахшида ба ҷашни 20 солагии Истиқлолияти кишвар корҳои ободонию бунёдкорӣ босубот идома дорад. Тибқи нақшаи мақомоти ҳокимияти давлатии ноҳия 20 иншооти ҳаётан муҳим, аз ҷумла, 6 иншооти соҳаи маориф, 2 муассисаи тандурустӣ, 2 иншооти варзишӣ, 2 иншооти фарҳангӣ, 3 бинои маъмурӣ, 2 корхонаи истеҳсолӣ, 3 маркази хизматрасонӣ ва савдо бахшида ба 20-умин солгарди Истиқлолияти давлатии Ҷумҳурии Тоҷикистон ба истифода дода хоҳад шуд.     Бо мақсади сазовор пешвоз гирифтани Истиқлолияти давлатӣ кор дар дар ҳамаи иншооти ҷашнӣ тибқи нақша ва бо вусъати том ба роҳ монда шудааст. Аз ҷумла, дар назар аст, ки дар деҳаҳои дурдасти Мурияк ва Кучкина урдугоҳи истироҳатӣ ва толори варзишӣ ба истифода дода шавад.    Қобили зикр аст, ки дар давраи Истиқлолияти Ҷумҳурии Тоҷикистон дар маркази маъмурии ноҳия ва марказҳои ҷамоати деҳот иншооти зиёди зебову замонавӣ қомат афрохтаанд. Иншооти сохташаванда дар чаҳорчӯби талаботи меъмориву лоиҳакашӣ ва сохтмонӣ бунёд гардида, ҷараёни иҷрои корҳои сохтмонӣ таҳти назорати мутахассисон қарор дорад.      Дар иншооти мазкур алҳол 250 нафар сохтмончиён машғули кор буда, баъди мавриди истифода қарор гирифтани онҳо 120 ҷойи кори нав муҳайё мегардад.