ТОРНИГОРИ НАВИ ҶҲАТ

   Душанбе, 12 феврал.(АМИТ «Ховар», Марзия Саидова).- Ҷамъияти Ҳилоли Аҳмари Тоҷикистон /ҶҲАТ/ соҳиби торнигори нави худ дар шабакаи Интернет гардид, ки он бо суроғаи зайл http://tajikistanrc.wordpress.com/ дастрас аст.Торнигори мазкур ахиран сохта шуда, ба фаъолият оғоз кардааст ва баъзе аз бахшҳои он дертар фаъол хоҳанд шуд. Зафар Муҳаббатов, котиби генералии ҶҲАТ, ба хабарнигори АМИТ «Ховар» иттилоъ дод, ки торнигори мазкур дар огоҳ сохтани аҳолӣ ва донорҳо бо тозатарин хабарҳои ҶҲАТ нақши муҳим мебозад. Ба андешаи Зафар Муҳаббатов, хонандагони торнигорашон ғайр аз хабарҳо, инчунин имкон доранд, ки аз нигористонҳои аксӣ марбут ба фаъолияти ҷамъият ва дар ояндаи наздик аз видеоҳо низ истифода кунанд.   Ҳамзамон З. Муҳаббатов афзуд, ки хонандагон имкон доранд, ки тавассути торнигор ба хадамоти обунаи интернетӣ дастрасӣ дошта бошанд. Забони асосии торнигори нави ҶҲАТ тоҷикӣ буда, инчунин бо забонҳои русӣ ва англисӣ низ дастрас хоҳад шуд.   Мавриди зикр аст, ки торнигорро вебблоггери маъруф ва аз нахустин вебблоггерҳои тоҷик Абдулфаттоҳ Шафиев сохтааст ва онро идора мекунад. Ин чорумин вебблоги Абдулфаттоҳ Шафиев буда, яке аз барномаҳои қаблии ӯ торнигори «Футболи Тоҷикистон» аст, ки миёни истифодабардагони интернет дар Тоҷикистон маҳбубияти хоса касб кардааст.