ИШТИРОКИ ТОҶИКОН ДАР НАМОИШГОҲИ ITB-БЕРЛИН

Душанбе, 10 март. (АМИТ «Ховар», Дилшодаи Хайруллоҳ).-Имрӯз дар шаҳри Берлини Ҷумҳурии  Федеративии Олмон намоишгоҳи байналмилалии ITB-Берлин ба кори худ оғоз кард. Бо дастгирии бевоситаи Президенти Ҷумҳурии Тоҷикистон  Эмомалӣ Раҳмон намояндагони 10 ташкилоти сайёҳии кишвар ва ширкати ҳавопаймоии «Сомон-Эйр» то 11-уми марти соли равон     дар ин чорабинии бонуфузи байналхалқӣ ширкат менамоянд.   Бояд гуфт, ки бо дастгирии Ҳукумати Ҷумҳурии Тоҷикистон лавҳаи ҷумҳуриявӣ дар масоҳати 60 метри мураббаъ иҷора гирифта шуда, дар доираи он маводи тарғиботии ширкатҳои сайёҳии мамлакат, ки инъикосгари захираҳои бойи таърихиву фарҳангӣ ва табиии кишвар мебошанд, дар байни дӯстдорону ҳаводорони сайру саёҳати ҷаҳон паҳн   мешаванд. Ёдовар мешавем, ки Намоишгоҳи байналмилалии сайёҳии шаҳри Берлин   аз намоишгоҳҳои нисбатан машҳури ҷаҳонӣ маҳсуб гардида, ҳамасола таҳти сарпарастии Ташкилоти умумиҷаҳонии сайёҳии Созмони Миллали Муттаҳид баргузор мегардад. Вобаста ба ин ва бо  назардошти ворид шудани Ҷумҳурии Тоҷикистон ба узвияти ин ташкилот ҳамчун аъзои комилҳуқуқ, иштироки намояндагони ҷумҳурӣ дар намоишгоҳи мазкур барои таблиғи захираҳои сайёҳии кишвар хеле манфиатбахш хоҳад буд.