ОЗМУНИ МАВОДИ БЕҲТАРИН ҶАМЪБАСТ ГАРДИД

Душанбе, 11 март. (АМИТ «Ховар», Бекназари Абӯбакр). — Бахшида ба Рўзи матбуоти тоҷик  дар толори маҷлисгоҳи факултаи филологияи тоҷики Донишгоҳи давлатии Хуҷанд ба номи академик Бобоҷон Ғафуров чорабинии идона бо иштироки устодону донишҷўёни факулта ва намояндагони ВАО гузаронида шуд. Дар маҳфил устоди донишгоҳ Исломҷон Бобоев аз таърихи нашри аввалин рўзнома ба забони тоҷикӣ бо номи «Бухорои Шариф» сухан гуфт. Декани факултаи филологияи тоҷик, доктори илмҳои суханшиносӣ, профессор Матлуба Хоҷаева роҷеъ ба  дастовардҳои  тӯли солҳои соҳибистиқлолӣ ба даст оварда сухан гуфта, матбуотро дар ҷаҳони муосир муҳим ва суханваронро оинаи ҷомеа номид. Дар маҳфили мазкур озмуни мавод ва буклети беҳтарин, аз қабили «Мактаби чирадаст»-и Отахон Латифӣ, «Назаре ба журналистикаи давлатҳои Русия, Олмон, ИМА», «Гулистони Айнӣ», «Парвози орзу», ки аз маҷмўи мақола ва қиссаҳои донишҷўёни соли дуввуми бахши рўзноманигорӣ иборат буд, ҷамъбаст  шуд. Ҳайати доварон, ки ба он  сармуҳаррири рўзномаи «Ҳақиқати Суғд» Карими Шариф, сармуҳаррири рўзномаи «Нури маърифат»-и донишгоҳ Зебо Абдуллоева низ шомил буданд, ҷои аввалро ба донишҷўёни курси IV, ҷои дуюмро ба донишҷўёни курси II ва III ва ҷои сеюмро ба донишҷўёни курси I ва V сазовор  донистанд. Ғолибон  бо тўҳфаҳои хотиравӣ сарфароз гардиданд.