Идомаи сафари кории Сарвари Давлат дар шаҳри Турсунзода

Душанбе, 22 июл. (АМИТ «Ховар», Дилшодаи Хайруллоҳ). – Тавре иттилоъ додем, айни ҳол Президенти кишвар Эмомалӣ Раҳмон дар шаҳри Турсунзода қарор дорад.Сарвари давлат Эмомалӣ Раҳмон дар расми ифтитоҳи сехҳои истеҳсоли орд, макарон, маҳсулоти қаннодӣ ва қуттиҳои коғазии корхонаи ҶДММ «Сомон-Тӯрон-инвест»-и шаҳри Турсунзода иштирок намуд. Бояд гуфт, ки фармоишгари корхонаи мазкур соҳибкори маҳаллӣ Парвиз Рӯзиев буда, аз ҳисоби худи ӯ бо ҷалби сармоягузорон корхона ба истифода дода шуд.Сехи ордбарорӣ бо таҷзиҳоти технологии сохти Туркия муҷаҳҳаз шуда, дар як шабонарўз метавонад 100 тонна гандумро коркард карда, 37 нафар шаҳрвандро бо ҷойи кори доимӣ таъмин намояд.Орди ин сех ҳам дар истеҳсоли 12 намуд макарон ва ширинию қаннодии ҳамин корхона истифода мешавад ва ҳам ба бозор бароварда мешавад.Роҳбарияти корхона бо ҳидояти Сарвари Давлат ўҳдадор шуданд, ки нархи халтаи 50 килограммаи ордро аз 125 то 110 сомонӣ арзон намоянд.Таҷҳизоти сехи макаронбарорӣ аз Ҷумҳурии Украина оварда шудааст. Иқтидори сехи макаронбарорӣ дар як моҳ 12-13 тоннаро ташкил дода, зиёда аз 45 нафар шаҳрванд бо ҷойи кори доимӣ таъмин шуданд. Дар ин корхона бо таҷҳизоти муосир ҳамчунин қуттиҳои картонӣ барои бастабандии маҳсулоти худи корхона ва ҳам меваю сабзавот истеҳсол мешавад.