Ҳаҷми маҳсулоти соҳаи моҳипарварӣ зиёд шуд

Душанбе, 10 октябр. (АМИТ «Ховар», Покиза Маҳмадбекова). – Дар Тоҷикистон ҳаҷми маҳсулоти соҳаи моҳипарварӣ аз моҳи январ то августи соли ҷорӣ 3,1 млн. сомонӣ ё нисбат ба ҳамин давраи соли гузашта 63,5% зиёд шуд.Тибқи иттилои Агентии омори назди Президенти ҶТ дар давраи ҳисоботӣ миқдори умумии сайди моҳӣ дар ҷумҳурӣ зиёда аз 217,9 тонна, аз ҷумла дар хоҷагиҳои вилояти Хатлон аз ҳама бештар- 127,3 тонна, вилояти Суғд – 59,5 тонна ва дар ВМКБ  – 25,9 тоннаро ташкил дод. Дар давраи ҳисоботӣ дар масоҳати 44 гектар барои парвариши моҳӣ ҳавзҳо бунёд гардид. То имрӯз ба ҷумҳурӣ 190,7 тонна хӯроки моҳӣ дохил шудааст, ки аз он ба хоҷагиҳои вилояти Хатлон — 55,3 тонна, вилояти Суғд – 2 тонна ва Ваҳдат – 6,5 тонна ворид гардид. Дар ин давра хароҷоти сарфшуда барои парвариши моҳӣ ва гузаронидани корҳои илмӣ-тадқиқотӣ зиёда аз 1 млн. сомониро ташкил дод.