Ҳуқуқи муаллифонро кӣ ҳимоя мекунад ?

Душанбе, 28 октябр. (АМИТ «Ховар», Дилшодаи  Хайруллоҳ).- Дирӯз дар  Вазорати фарҳанги  Ҷумҳурии Тоҷикистон дар  мавзӯи  «Қонунгузории Ҷумҳурии Тоҷикистон оид  ба ҳуқуқи муаллиф ва ҳуқуқҳои иҷрогарон» семинар  баргузор  гардид.Дар семинар Вазири фарҳанги ҶТ Мирзошоҳрух Асрорӣ, намояндаи дастгоҳи иҷроияи Президенти ҶТ  ва масъулини соҳа иштирок доштанд.  Семинари  мазкур  бо мақсади пешгирии ҳуқуқвайронкунӣ дар  соҳаи  ҳуқуқи муаллиф, ҳамкории мақомоти дахлдор, муассисаву идораҳое, ки  бевосита бо  пешгирии вайрон  кардани ҳуқуқ дар ин соҳа фаъолият мекунанд, беҳтар намудани ҳифзи манфиатҳои муаллифон ҳангоми  истифодаи асарҳои онҳо,  омӯзиши санадҳои  ҳуқуқию  меъёрие,  ки  муносибатҳои  байни  муаллифонро   ба танзим  медарорад,  ҳифзи  моликияти    зеҳнӣ, ҳалли  мушкилоти  соҳа ва  дигар масъалаҳо доир гардидааст.Масъалаи  дигаре, ки дар ин  семинар  мавриди  омӯзиши  ҷиддӣ  қарор  гирифт, мутобиқати муқаррароти қонунгузории  Ҷумҳурии  Тоҷикистон  дар  бораи  ҳуқуқи  муаллиф  ба  талаботи Конвенсияи   Созмони  умумиҷаҳонии  тиҷорат  оид  ба ҷанбаи  ҳуқуқии моликияти  зеҳнӣ мебошад.  Мутахассисон доир  ба  мутобиқ  намудани  қонунгузории  Ҷумҳурии  Тоҷикистон  бо муқаррароти Созишнома  пешниҳодҳои  худро  иброз доштанд.