АИ кишоварзӣ ва амнияти озуқаворӣ

Душанбе, 22 декабр. (АИТ «Ховар», Лаззат Диловарзод).- Академияи илмҳои кишоварзии Тоҷикистон дар солҳои фаъолияташ ба муассисаи бонуфузи илмии ҷумҳурӣ табдил гардида, дар беҳдошти амнияти озуқавории мамлакат ҳиссаи арзанда гузоштааст,- иброз дошт зимни сӯҳбат президенти АИ кишоварзии Тоҷикистон Ҳикматулло Аҳмадов ба мухбири АМИТ «Ховар». Дар 20 соли сипаригардида олимони Академия 110 навъи зироати кишоварзӣ, 36 навъи дарахтони босамар, сабзавот, 2 зоти кирмаки абрешим, 5 намуди мошини кишоварзӣ, 11 намуди ваксина, 22 намуди доруҳои байторӣ, навъи нави говҳои сиёҳалои тоҷикӣ, бузҳои серпашми тоҷикӣ ва мурғҳои сермаҳсули навъи крросро ба вучуд оварданд. Ба замми ҳамаи ин, дар Маркази миллии ҷумҳуриявии захираҳои генетикӣ беш аз 6 ҳазор тухмии навъи маҳаллӣ ҷамъ оварда шуд, ки дар корҳои селексионӣ мавриди истифода қарор доранд.