ДИТ бо Русия ва Мисру Туркия тасмими ҳамкорӣ дорад

Душанбе, 26 январ.(АМИТ «Ховар», Марзия Саидова).-Донишкадаи исломии Тоҷикистон /ДИТ/ ба номи Имоми Аъзам-Абӯҳанифа тасмим гирифтааст, ки бо донишгоҳҳои исломии кишварҳои Русия, Туркия ва Мисри Араб ҳамкории мутақобилан судмандро ба роҳ монад. «Нисбат ба ин масъала лоиҳаи тафоҳумнома омода шудааст»,- гуфт зимни нишасти матбуотӣ ба хабарнигорон ректори ДИТ ба номи Имоми Аъзам Умаралӣ Назарзода. Мавсуф зикр кард, ки чанде қабл ҳайате аз устодони ДИТ аз шаҳри Қазони Тотористон баргаштанд. Онҳо зимни сафарашон аз Донишгоҳи исломии шаҳри Қазон боздид намуда, бо фаъолияти таълимӣ ва коргузорӣ дар ин донишгоҳ ошно гаштанд. Дар оянда бо имзои санадҳои ҳамкорӣ ДИТ имкон дорад бо ин донишгоҳи исломии Русия дар мавриди табодули таҷриба дар самти устодону донишҷӯён ҳамкории мутақобилан судмандро роҳандозӣ намояд, ки он ба манфиати ҳарду ҷониб аст. Алҳол дар ДИТ наздик ба 1800 донишҷӯ ба таҳсил фаро гирифта шудааст, ки беш аз 800 нафарашон дар бахши буҷавӣ ва 900 нафарашон дар бахши шартномавӣ таҳсил менамоянд.