Душанбегиҳо, об захира намоед!

Душанбе, 2 феврал.(АМИТ «Ховар», Марзия Саидова).-Бо мақсади иваз намудани қубурҳои андозаашон 400 мм ба қубури 600 мм, дар кӯчаи Дӯстии халқҳо аз соати 8.00-и 7 феврал то соати 8.00-и 8 феврал дар кӯчаҳои Дӯстии халқҳо, Беҳзод, М. Қурбонов, Репин, А. Адҳамов, А. Дониш ва маҳаллаи Бадахшон,1, 2 –и пойтахт интиқоли оби нӯшокӣ қатъ карда мешавад. Дар робита ба ин аз сокинони маҳаллаю кӯчаҳои зикршуда хоҳиш карда мешавад, ки миқдори лозимии оби нӯшокиро барои як шабонарӯз захира намоянд. Дар асоси қарори Раиси шаҳри Душанбе Маҳмадсаид Убайдуллоев раисони ноҳияҳои И. Сомонӣ ва Шоҳмансур А. Қурбонов ва С.Бобоев, инчунин директори Корхонаи воҳиди давлатии «Обу корези Душанбе» — Ф. Исупов вазифадор шудаанд, ки дар давраи иҷрои корҳои таъмирӣ бо истифода аз мошинҳои обкаш сокинони маҳаллаҳои номбурдаро бо оби нӯшокӣ таъмин намоянд. Ҳамзамон ба сардори Маркази назорати давлатии санитарию эпидемиологии шаҳри Душанбе З. Авғонов супориш дода шудааст, ки дар ҷараёни иҷрои корҳои таъмирӣ таъмини аҳолиро бо оби нӯшокӣ мутобиқ ба талаботи беҳдоштӣ таҳти назорат қарор диҳад.