Гирифтани иҷозатномаи ВКД ҳатмӣ шуд

Душанбе, 2 феврал.(АМИТ «Ховар», Марзия Саидова).-Минбаъд танҳо дар асоси гирифтани иҷозатномаи Вазорати корҳои дохилии кишвар шаҳрвандони Ҷумҳурии Тоҷикистон имкони хариди яроқи пневматикиро доранд. Дар ин хусус палатаи поёнии парлумони мамлакат дар ҷаласаи навбатии худ ба лоиҳаи Қонуни Ҷумҳурии Тоҷикистон «Дар бораи яроқ» иловаҳо ворид намуд. Саид Ҷӯрахонов, муовини вазири корҳои дохилии ҷумҳурӣ гуфт, ки қонуни мазкур таъмини амнияти давлатӣ, тартиботи ҷамъиятӣ, пешгирии ҷинояткорӣ ва ҳуқуқвайронкуниҳои маъмурӣ, ҳимояи шаҳрвандон ва ба низом даровардани қонунгузории кишварро вобаста ба харид, гирифта гаштан, нигоҳ доштани яроқҳои пневматикӣ, хусусан таппончаҳои пневматикӣ аз ҷониби шаҳрвандон дар қаламрави Тоҷикистон ба танзим медарорад.  Тибқи қонуни мазкур шаҳрвандоне, ки ҷои зисти доимӣ надоранд, синнашон ба 18 нарасидааст, гирифтори бемориҳои рӯҳӣ, майзадагӣ, нашъамандӣ, дорои нуқсонҳои ҷисмонианд, инчунин шахсоне, ки тартиботи ҷамъиятиро вайрон мекунанд ё дар ҳолати адои ҷазо қарор доранд, аз ҳуқуқи харидани яроқи пневматикӣ маҳрум буда, ба онҳо иҷозатномаи мақомоти марбутаи корҳои дохилӣ дода намешавад.